Vllaznia – Tirana ishte kryesfida e javës së gjashtë në volejboll për femra dhe për meshkuj që është luajtur të premten dhe të shtunën në Pallatin e Sportit “Qazim Dervishi”. Një fitore spektakolare e shkodranëve të Artan Kalasë, 3-1 përballë kampionëve në fuqi. 25-21 seti i parë për shkodranët. Kundërpërgjigjet Tirana 18-25 e më pas dy sete radhazi Vllaznia, 25-16 dhe 25-23

“Këtë skuadër kërkoj. Tirana është skuadër kampione, është skuadër që ka investuar dhe në lojtarë të huaj. Por edhe ne nuk është se nuk jemi stërvitur. E kemi marrë seriozisht, ekipi është mobilizuar. Unë i them çunave urime dhe bravo ju qoftë”, shpjegon Artan Kalaja.

 “Skuadra e Tiranës është një skuadër për momentin në kolaudim e sipër. Edhe unë nuk është se prisja një humbje në Shkodër, por prisja një lojë shumë të fortë”, thekson Arben Sako.

Të shtunën tjetër melodi, sepse Tirana e Hasan Gurabardhit ka fituar 3-0, edhe me një lojë jo fort të mirë. 25-27, 24-26, 18-25 që vërteton suksesin e vuajtur të vajzave bardheblu.

“Vajzat bënë një lojë dinjitoze. Është e gjithë puna që bëjnë në stërvitje. Por kualitetet mungojnë”, nënvizon Nora Deda.

“Ne në fakt na bëri çudi që mundën Barletin para 3-4 javësh. Por sot megjithëmend që kanë bërë një lojë të shkëlqyer, sidomos në mbrojtje. Kanë luajtur pa gabime dhe kanë luftuar deri në fund”, përfundon Hasan Gurabardhi.