Drejtoria Vendore e Policisë Tiranë bëri të ditur se specialistët për Hetimin e Krimit Ekonomik dhe Financiar në DVP Tiranë, pas komunikimit me Prokurorin referuan materialet në Prokurori, ku nisi procedimi në gjendje të lirë për shtetasin F. N, me detyrë Sekretar i Përgjithshëm i Partisë Demokratike, për veprën penale “Kanosja/dhunimi ndaj pjesëmarrësve në zgjedhje”.

“Procedimi në gjendje të lirë nisi pasi në bazë të kallëzimeve të shtetasve Xh. A., 29 vjeç dhe M. D., 33 vjeç, ky shtetas ditën e sotme, në Vorë, i ka penguar dhe kanosur për të ushtruar të drejtën e votimit. Materialet procedurale do t’i referohen SPAK, për hetime të mëtejshme.”, njofton policia.

U vu nën hetim pas përplasjes në Vorë, reagon Noka

Sekretari i Përgjithshëm i PD, Flamur Noka ka reaguar pas procedimit në gjendje të lirë në lidhje me incidentin në qendrën e votimit në Vorë.

Më anë të një reagimin në rrjetet sociale, Noka thotë se u procedua sepse preku interesat e mafies në pushtet në Vorë.

“Sot jam proceduar penalisht me akuzën e veprës penale “Kanosja/dhunimi ndaj pjesëmarrësve në zgjedhje”. Ftoj të gjithë qytetarët të shikojnë në faqen time video-lajmin e arrestimit nga policia të shtetasit Xhoni Asllanaj, me të cilin sot u përballa në qendrën e votimit në Vorë! Xhoni Asllanaj është nipi dhe shoferi i Albert Xhabaftit të Vorës dhe është i skeduar për vjedhje dhe armëmbajtje pa leje.

/rtsh.al/