Dhoma e Përfaqësuesve në Shtetet e Bashkuara votoi me shumicë dërrmuese të martën në favor të një projektligji që detyron Departamentin e Drejtësisë të publikojë të gjitha dosjet e tij mbi shkelësin e dënuar për krime seksuale, financierin Jeffrey Epstein.

Kjo votë shënon një zhvillim të jashtëzakonshëm, duke treguar presionin në rritje mbi ligjvënësit dhe administratën e Presidentit Donald Trump për të përmbushur kërkesat e hershme për transparencë.

Projektligji, i cili kishte luftuar për muaj të tërë për të kapërcyer kundërshtimin, arriti në votim përmes një manovre të një grupi të vogël ligjvënësish dypartiakë, të cilët paraqitën një peticion për të anashkaluar kontrollin e Kryetarit të Dhomës, Mike Johnson.

Përpjekjet e Presidentit Trump për të bllokuar votimin dështuan, pasi ai më parë u kishte kërkuar mbështetësve të tij ta shpërfillnin çështjen si një “mashtrim”. Tashmë, me vrullin në rritje pas projektligjit, Presidenti Trump është përkulur para kërkesës dhe ka deklaruar se do ta nënshkruajë atë, nëse miratohet edhe nga Senati.

Jeffrey Epstein, një financier, vrau veten në një burg të Manhatanit në vitin 2019, ndërsa priste gjyqin me akuzat se kishte abuzuar seksualisht dhe trafikuar vajza të mitura. Publikimi i dosjeve shihet si një hap drejt zbardhjes së të gjithë rrjetit të abuzimit.

/rtsh.al/