Përpjekjet e administratës amerikane për të rihapur procesin penal ndaj ish-kreut të FBI-së, James Comey, kanë hasur në një pengesë serioze ligjore. Gjyqtarja federale Colleen Kollar-Kotelly ka urdhëruar Departamentin e Drejtësisë (DOJ) të ndalojë përkohësisht përdorimin e provave elektronike mbi të cilat mbështetej aktakuza origjinale, duke e bërë gjithnjë e më të vështirë ringritjen e çështjes.

Në qendër të betejës ligjore janë komunikimet midis Comey-t dhe mikut të tij të ngushtë, profesorit të drejtësisë Daniel Richman. Prokurorët pretendojnë se këto mesazhe provojnë se Comey gënjeu Kongresin në vitin 2020, kur mohoi se kishte autorizuar Richman-in të shërbente si burim anonim për mediat.

Megjithatë, avokatët e Richman argumentuan me sukses se DOJ i kishte siguruar këto të dhëna përmes urdhër-kontrolleve të vitit 2019 dhe 2020 për një çështje tjetër, dhe se po i mbante ato në mënyrë të paligjshme. Gjyqtarja Kollar-Kotelly vendosi në favor të tyre, duke urdhëruar prokurorët “të mos hyjnë, të mos ndajnë dhe të mos përdorin materialet” pa lejen e Gjykatës, duke cituar rrezikun e shkeljes së Amendamentit të Katërt.

Kjo është goditja e dytë për prokurorët brenda pak javësh. Çështja fillestare u rrëzua muajin e kaluar pasi gjykata vendosi se prokurorja Lindsey Halligan, e cila ngriti akuzat, ishte emëruar në mënyrë të paligjshme nga administrata Trump.

Tani, prokurorët gjenden në një garë kundër kohës. Avokatët e Comey-t pretendojnë se afati i parashkrimit për dëshminë e dhënë në shtator 2020 (më shumë se 5 vite më parë) ka skaduar tashmë, duke e bërë ligjërisht të pamundur çdo padi të re, pavarësisht provave.

Rasti “Comey” shihet gjerësisht si pjesë e një fushate ligjore kundër kundërshtarëve të perceptuar të Presidentit Trump në mandatin e tij të dytë.

/rtsh.al/