Zëdhënësja e Ministrisë së Jashtme, Mao Ning ka deklaruar se Kina beson se të gjitha vendet duhet të respektojnë rrugët e zgjedhura nga popujt e vendeve të tjera, si dhe të zbatojnë ligjin ndërkombëtar dhe qëllimet e parimet e Kartës së OKB-së.

Ajo shtoi se vendet e mëdha, në veçanti, duhet të japin shembull të mirë dhe asnjë vend nuk duhet të sillet si polic apo gjyqtar i botës.

Mao Ning i bëri këto komente gjatë një konference shtypi, në përgjigje të pyetjes lidhur me situatën në Venezuelë.

Ajo theksoi se Këshilli i Sigurimit i OKB-së mbajti një mbledhje emergjente për sulmet ushtarake amerikane ndaj Venezuelës, ku përfaqësuesi i Kinës nënvizoi se mjetet ushtarake nuk janë zgjidhje për problemet dhe përdorimi i pakufizuar i forcës vetëm do të çojë në kriza më të mëdha.

“Kina mbështet fuqishëm qeverinë dhe popullin e Venezuelës në mbrojtjen e sovranitetit, sigurisë dhe të drejtave legjitime të tyre, si dhe mbështet fuqishëm vendet e rajonit në ruajtjen e statusit të Amerikës Latine dhe Karaibeve si zonë paqeje,” tha Mao.

Kina mbron vizionin e sigurisë së përbashkët, gjithëpërfshirëse, bashkëpunuese dhe të qëndrueshme, respekton sovranitetin dhe integritetin territorial të të gjitha vendeve, i merr seriozisht shqetësimet legjitime të sigurisë së vendeve të tjera dhe mbështet zgjidhjen e dallimeve e mosmarrëveshjeve përmes dialogut dhe konsultimeve paqësore, shtoi zëdhënësja.

Sipas saj, Kina është e gatshme të bashkëpunojë me vendet e tjera për të mbrojtur autoritetin e ligjit ndërkombëtar, për të refuzuar ligjin e xhunglës, për të kundërshtuar ndërhyrjet në punët e brendshme të vendeve dhe për të ruajtur së bashku paqen dhe stabilitetin botëror, përfundoi ajo.

Kjo deklaratë vjen pas sulmeve ushtarake amerikane të 3 janarit në Venezuelë, ku forcat amerikane kryen goditje në Caracas dhe zona të tjera, duke çuar në kapjen dhe largimin e presidentit Nicolás Maduro dhe bashkëshortes së tij.

Ngjarja ka shkaktuar reagime të forta ndërkombëtare, me mbledhjen emergjente në Këshillin e Sigurimit të OKB-së dhe dënime nga vende si Kina, Rusia dhe disa shtete latinoamerikane, ndërsa të tjerë e shohin si hap drejt tranzicionit.

/rtsh.al/