Rusia kritikoi të shtunën Presidentin e SHBA-së, Donald Trump, dhe Izraelin për nisjen e një sulmi të rrezikshëm dhe të papërgjegjshëm ndaj Iranit, duke paralajmëruar se veprimet e tyre po e zhysin të gjithë Lindjen e Mesme në një humnerë përshkallëzimi.

Ministria e Jashtme e Rusisë reagoi ashpër, duke thënë se Uashingtoni dhe Tel Avivi janë përfshirë në një “aventurë të rrezikshme” që po e çon rajonin drejt një katastrofe humanitare, ekonomike dhe madje edhe radiologjike.

“Duke e zhytur Lindjen e Mesme në një humnerë përshkallëzimi të pakontrolluar, ata në fakt po inkurajojnë vendet në mbarë botën, kryesisht në rajon, të pajisen me mjete gjithnjë e më serioze kundër kërcënimeve në zhvillim,” tha Moska.

Dmitry Medvedev, nënkryetar i Këshillit të Sigurisë së Rusisë dhe ish-president, e qortoi Trumpin për sulmin ndaj Iranit dhe vuri në pikëpyetje qëndrueshmërinë e SHBA-së krahasuar me historinë e gjatë të qytetërimit persian.

 “Paqeruajtësi është përsëri në punë. Bisedimet me Iranin ishin vetëm një mbulesë. Të gjithë e dinin këtë,” tha Medvedev në anglisht.

Ai shtoi me ironi se “SHBA-të janë vetëm 249 vjeç. Perandoria Persiane u themelua mbi 2500 vjet më parë. Le të shohim se çfarë do të ndodhë pas rreth 100 vjetësh.”

Shtetet e Bashkuara dhe Izraeli nisën sulme ndaj Iranit, duke synuar udhëheqjen e tij dhe duke hapur një konflikt të ri në rajon.

Trump deklaroi se operacioni do t’i jepte fund një kërcënimi ndaj sigurisë së SHBA-së dhe do t’u ofronte iranianëve një mundësi për të rrëzuar sundimtarët e tyre.

/rtsh.al/