Ministri i Punëve të Brendshme, Besfort Lamallari, zhvilloi një takim të rëndësishëm me përfaqësues të Zyrës së Kombeve të Bashkuara për Drogën dhe Krimin (UNODC). Në fokus të bisedimeve ishte thellimi i bashkëpunimit dypalësh në luftën kundër krimit të organizuar, si dhe prezantimi i projekteve të reja që synojnë rritjen e sigurisë në vend.

Përmes një mesazhi të ndarë në rrjetet sociale, Ministri Lamallari e cilësoi takimin si tejet të frytshëm, duke theksuar se palët rikonfirmuan angazhimin e përbashkët për të goditur korrupsionin, trafiqet e paligjshme, drogën dhe për të parandaluar terrorizmin.

Zgjerimi i prezencës së UNODC në Shqipëri

Një nga pikat kryesore të takimit ishte konsolidimi i rolit të agjencisë së OKB-së në vendin tonë.

“Jemi në rrugë të mbarë për të finalizuar forcimin e prezencës së kësaj zyre në vendin tonë në kuadër të Programit Rajonal për Evropën Juglindore 2024–2029, që do të rrisë bashkëpunimin me institucionet shqiptare dhe zhvillimin e projekteve të përbashkëta,” u shpreh kreu i Ministrisë së Brendshme.

Gjatë tryezës u diskutuan dy nisma konkrete që pritet të kenë një ndikim të drejtpërdrejtë në sigurinë dhe shoqërinë shqiptare.

U propozua ngritja e një pike të dedikuar të UNODC në Rinas, me qëllim menaxhimin më efektiv të flukseve të migracionit dhe rritjen e sigurisë kufitare, si dhe ngritja e një qendre për Rehabilitimin e të Miturve. Shqipëria kërkon angazhimin e drejtpërdrejtë të UNODC-së në këtë qendër.

Projekti synon riintegrimin e plotë të të miturve në shoqëri, me ambicien e qartë që ky institucion të shërbejë si një model suksesi dhe referimi për të gjithë rajonin e Ballkanit.

/rtsh.al/