Kryeministri Edi Rama ka komentuar në podkastin e tij “Flasim” mëngjesin e së dielës, më 31 maj, duke u ndalur tek zhvillimet kryesore të javës së fundit, me theks të veçantë tek procesi i integrimit të Shqipërisë në Bashkimin Europian.

Rama e cilësoi datën 26 maj si momentin më të lartë të arritur ndonjëherë nga vendi në rrugëtimin europian.

“Shqipëria u ngjit në pikën më të lartë ndonjëherë, tanimë maja ku do të ngjitemi dhe do vendosim flamurin kuqezi, duke i dhënë kuptim një historie të gjatë ëndërrimi për BE. Është moment jashtëzakonisht kuptimplotë dhe certifikim absolut i një pune të palodhur, të një kohe të gjatë. Ky nuk është thjesht një sukses në rrugën e negociatave, por një rezultat i transformimeve të thella që vendi ynë ka bërë në dekadën e fundit,” – theksoi ai.

Kryeministri solli në vëmendje edhe simbolikën e datës, duke e krahasuar me 26 majin e vitit 1996, kur opozita u përball me dhunë, gjakderdhje dhe manipulim zgjedhjesh.

 “Tridhjetë vjet më pas, më 26 maj 2026, Shqipëria hyri në fazën e fundit të rrugëtimit europian, duke mbyllur fazën e hapjes së kapitujve të negociatave dhe duke nisur fazën e mbylljes së tyre,” – tha Rama, duke e cilësuar këtë si një ironi të fatit dhe një buzëqeshje të historisë.

Sipas tij, ky moment është një provë e përgjegjësisë së madhe që i takon vendit, pasi integrimi nuk është vetëm një proces formal, por një reflektim i reformave dhe transformimeve të kryera në dekadën e fundit.

Lajmi në zhvillim….

/rtsh.al/