Presidenti francez Emmanuel Macron deklaroi se Mali i Zi ka zbatuar reforma të rëndësishme me vendosmëri evropiane, duke e cilësuar këtë si një mundësi të madhe për Evropën.

Macron ndodhet për vizitë zyrtare në Mal të Zi – e para e një presidenti francez në këtë vend – vetëm një ditë përpara Samitit BE–Ballkani Perëndimor që do të mbahet në Tivat.

Në konferencën e përbashkët për shtyp me Presidentin malazez Jakov Milatović, Macron tha se,
“Ne duam të zhvillojmë në mënyrë ambicioze bashkëpunimin dhe miqësinë me Malin e Zi. Do të nënshkruajmë marrëveshje të rëndësishme për energjinë, mbrojtjen dhe ndërtimin e spitaleve. Kjo përfshin edhe Qendrën për Zhvillimin e Kapaciteteve Kibernetike në Podgoricë.”

Ai theksoi se Franca do të mbetet në krah të Malit të Zi në fazën e fundit të rrugës drejt anëtarësimit në BE, duke përgëzuar reformat e kryera dhe mbylljen e kapitujve të negociatave.

Macron vlerësoi se Mali i Zi ka forcën për të ruajtur identitetin dhe sovranitetin e tij, duke e parë këtë si një vlerë për integrimin evropian.

/rtsh.al/