Partia Liberale (PL) ka njohur zyrtarisht fitoren e Luiz Inácio Lula da Silva në zgjedhjet presidenciale në Brazil, me gjithë deklarimet se procesi u shoqërua me luhatje politike. Në një qëndrim publik të nënshkruar nga kryetari Valdemar Costa Neto, subjekti politik sqaron pozicionin e tij institucional përkundërt vendimit zyrtar të certifikimit të votës.

Në deklaratën zyrtare nënvizohet qartë pranim i rezultatit ligjor të zgjedhjeve.

“Ne e njohim rezultatin presidencial të shpallur nga Gjykata e Lartë Zgjedhore”, thuhet në dokumentin e PL-së, ku më tej shtohet se “çështjet e ngritura duhet të sqarohen në një debat politik të ekuilibruar dhe demokratik”, me angazhimin për të kërkuar përgjigje me “përgjegjësi, transparencë dhe respekt për institucionet”.

Subjekti opozitar i është referuar edhe dinamikës së ndryshimit të votës mes dy raundeve zgjedhore.

“Flavio Bolsonaro fitoi raundin e parë të zgjedhjeve presidenciale me 2.2 milionë vota”, citon deklarata, duke shtuar se “në raundin e dytë rezultati ishte i ndryshëm, në një kontekst të karakterizuar nga presion i fortë elektoral, me ndikime ekonomike dhe sociale”.

Pavarësisht humbjes së ekzekutivit, Partia Liberale e vlerëson përfundimin e garës si “një rezultat historik: një shumicë prej 121 përfaqësuesish federalë, 29 senatorë, 229 përfaqësues shtetërorë dhe të rretheve dhe 6 guvernatorë”, duke premtuar se “do të vazhdojë të qëndrojë e vendosur, duke vepruar në mënyrë të pavarur dhe të përgjegjshme”.

Paralelisht me zhvillimet politike, sistemi i drejtësisë ka nisur hetime me peshë mbi financimin e fushatës së kandidatit të mundur. Gjyqtari i Gjykatës së Lartë, Flavio Dino, ka urdhëruar një hetim mbi financimin e jashtëm, përfshirë dyshimet ndaj kompanisë Rockbridge Network dhe shkëmbimin e mundshëm të mbështetjes financiare me aksesin në mineralet kritike.

Hetimi shtrihet edhe te përdorimi i algoritmeve të rrjeteve sociale, pas ankesave ndaj platformave të Meta-s, me synim verifikimin e çdo veprimi “për të favorizuar disa kandidatë dhe për të penalizuar të tjerët”.

Në kuadër të këtyre proceseve gjyqësore, autoritetet kanë ndërmarrë masa shtrënguese ndaj vetë senatorit Flavio Bolsonaro. Burime policore konfirmuan se “pasaportat e Flavio Bolsonaros janë anuluar”, për shkak se dokumentet e udhëtimit nuk iu dorëzuan organeve të drejtësisë pas kërkesës zyrtare. Anulimi nxiti hetime nga Policia Federale mbi mundësinë e largimit të tij nga vendi, pas raportimeve të mediave se senatori mund të kishte kaluar kufirin drejt Argjentinës për të udhëtuar më pas drejt Shteteve të Bashkuara.

Këto pretendime për arratisje janë hedhur poshtë me shpejtësi nga autoritetet e vendit fqinj. Qeveria e presidentit Javier Milei deklaroi zyrtarisht se “Drejtoria Kombëtare e Migracionit nuk ka prova për hyrjen e Flavio Bolsonaros në Republikën e Argjentinës”.

Në lidhje me kontrollet e kryera mbi një mjet fluturimi privat në aeroportin e Puerto Iguazú, autoritetet argjentinase sqaruan se “u zbulua se dokumentacioni i kompanisë është në rregull dhe se nuk është paraqitur asnjë plan fluturimi që përfshin familjen Bolsonaro”, ndërsa zëdhënësi presidencial Adrian Ravier konfirmoi se “nuk është marrë asnjë kërkesë për azil në kufi”.

/rtsh.al/