Këshilli Mbikëqyrës i Bankës së Shqipërisë, në mbledhjen e zhvilluar më 3 nëntor 2026, vendosi që norma bazë e interesit të mbetet e pandryshuar në nivelin 2.5%. Po ashtu, normat e interesit për depozitën njëditore dhe kredinë njëditore do të mbeten përkatësisht në nivelet 1.5% dhe 3.5%.

Përveç vendimmarrjes mbi politikën monetare, banka qendrore miratoi një pako thelbësore rregullative që modernizon infrastrukturën kombëtare të transfertave dhe synon uljen e tarifave për pagesat me kartë.

Sistemi i ri IPSA, pagesa në lekë dhe euro brenda 10 sekondave, 24/7

Zhvillimi kryesor rregullativ i miratuar në këtë mbledhje lidhet me funksionimin e sistemit të ri të pagesave të menjëhershme IPSA, si dhe përshtatjen e sistemeve ekzistuese të shlyerjes (AIPS, AIPS EURO dhe AECH).

Paketa e re përfshin miratimin e katër rregulloreve bazë:

1. “Për funksionimin e Sistemit të pagesave të menjëhershme – IPSA”
2. “Për funksionimin e Sistemit të pagesave ndërbankare me vlerë të madhe – AIPS”
3. “Për funksionimin e Sistemit AIPS EURO për shlyerjen e transfertave vendase për klientë në Euro”
4. “Për funksionimin e Sistemit të klerimit të pagesave me vlerë të vogël – AECH”

Përmes kësaj infrastrukture, Banka e Shqipërisë bën me dije se sistemi IPSA “do të mundësojë kryerjen e pagesave në lekë dhe euro në mënyrë të pandërprerë, 24 orë në ditë, 7 ditë në javë, gjatë gjithë vitit”.

Gjithashtu, ekzekutimi i transaksioneve do të bëhet në kohë reale, “brenda një kohe maksimale prej 10 sekondash nga pranimi i tyre nga ofruesi i shërbimeve të pagesave të dërguesit”.

Projekti realizohet në bashkëpunim me pesë banka qendrore të Ballkanit Perëndimor, ndërsa infrastruktura teknologjike dhe operacionale mbështetet nga Banka e Italisë, sipas modelit evropian TIPS.

Ulje kostosh për tregtarët, kufij të rinj për tarifat e kartave

Një tjetër vendim me rëndësi të veçantë për bizneset është miratimi i rregullores “Për tarifat e shkëmbimit për transaksionet e pagesave të bazuara në kartë”.

Kjo rregullore ndërhyn drejtpërdrejt te tarifat e shkëmbimit (interchange fees), të cilat përbëjnë një kosto të ndjeshme për tregtarët që pranojnë pagesa me kartë përmes terminaleve POS. Përmes kufijve të rinj rregullatorë, synohet ulja e këtyre shpenzimeve për biznesin.

Banka qendrore nënvizon se “ulja e këtyre kostove pritet të nxisë më shumë tregtarë të pranojnë pagesa me kartë, duke zgjeruar mundësitë e konsumatorëve për të përdorur pagesat elektronike”, si një alternativë më e sigurt dhe më efikase ndaj parasë fizike.

Në tërësi, këto masa konsiderohen hapa kyç për formalizimin e mëtejshëm të ekonomisë shqiptare dhe përafrimin e kuadrit financiar vendas me atë të Bashkimit Evropian.

/rtsh.al/