Tradita e mbledhjes dhe pjekjes së gështenjave në Reç po përcillet tashmë edhe tek brezi i ri. Një prej tyre është Besnik Metaj, i cili për të dytin vit radhazi mirëpret vizitorë të shumtë, duke i ofruar mundësinë të shijojnë gështenjat e sapopjekura, në një atmosferë që ndërthur natyrën me traditën vendase.

“Prej dy vitesh e kemi filluar këtë traditë dhe kanë ardhur njerëz nga shumë zona. Ka ndikuar për mirë”, tha Besnik Metaj, kultivues i gështenjave.

Sipas tij, këtë vit prodhimi i gështenjave ka qenë i kënaqshëm, duke bërë të mundur që aktiviteti të vijojë dhe të tërheqë gjithnjë e më shumë vizitorë.

“Ky vit ka qenë më mirë. Sa i përket çmimit, është 800 lekë kilogrami për gështenjat e pjekura, ndërsa të papjekurat me 350-300, varet. Ka shumë blerës”, u shpreh Metaj.

Me peizazhin karakteristik, ajrin e pastër dhe gështenjat që janë simbol i kësaj stine, Reçi po fiton gjithnjë e më shumë vëmendje si destinacion turistik. Një zonë që, veçanërisht gjatë vjeshtës, ofron jo vetëm produkte të natyrës, por edhe një përvojë të veçantë për familjet, vizitorët dhe grupet e nxënësve që zgjedhin ta vizitojnë.

Gazetar: M. Gjoni             

/rtsh.al/