Prokuroria e Vlorës ka kërkuar arrest me burg për një person dhe arrest shtëpie për motrën e toij, pasi kanë përvetësuar 13 mijë m² tokë me dokumente të falsifikuara.

Po ashtu, është sekuestruar pasuria me vlerë 2.7 milionë euro, pasi nga hetimet e nisura në 2021, ka rezultuar se motër e vëlla, e kanë regjistruar tokën prej 13 mijë m² pranë ASHK-së me dokumente të falsifikuara.

Në kohën e kryerjes së veprimeve, ndarje, transaksione/shitje, duke e kaluar pjesën më të madhe të tokës tek persona të tretë, E.M rezultonte në detyrë topograf në Bashkinë e Himarës.

Dokumentet e falsifikuara u përdorën në disa institucione nga ana e personave nën hetim, si; Këshillin e Qarkut Vlorë; Bashkinë Himarë; në procesin gjyqësor të zhvilluar pranë Gjykatës Administrative të Shkallës së Parë Vlorë si dhe më pas pranë ish-ZVRPP Vlorë (sot ASHK).

“Prokuroria pranë Gjykatës së Shkallës së Parë të Juridiksionit të Përgjithshëm Vlorë, vendosi sekuestrimin e 13.750 m² tokë e vlerësuar 2.750.000 euro, në fshatin Gjilek të Bashkisë Himarë, pasi nga hetimet u provua se është regjistruar pranë ASHK Vlorë me dokumente të falsifikuara.

Për regjistrimin e pronës shtetasja L.M., inicioi një proçes gjyqësor administrativ pranë Gjykatës së Shkallës së Parë Administrative Vlorë, ku kërkoi regjistrimin e të gjithë sipërfaqes sipas dokumentit pronësor AMTP nr.9859. Në gjykimin administrativ, nga ana e shtetasve E.M. dhe L.M., janë përdorur dokumentet e falsifikuara, Formular nr.6 dhe AMTP”, thuhet në njoftimin e Prokurorisë.

Pas regjistrimit pranë ish-ZVRPP Vlorë të sipërfaqes prej 13 mijë m² mbi këtë pasuri janë kryer veprime juridike me qëllim fshehjen/mbulimin e natyrës së paligjshme të pasurisë së përfituar me anë të dokumentave të falsifikuara.

Një pjesë e kësaj prone ka mbetur në bashkëpronësi të E.M. dhe L.M., ndërsa nga sipërfaqja totale prej 13.750 m², është shitur një sipërfaqe prej 7.050 m².

/rtsh.al/