Dermatologët në Mbretërinë e Bashkuar kanë ngritur shqetësimin se fëmijët deri në 10 vjeç kanë nisur të kërkojnë produkte të shtrenjta kundër plakjes, të cilat mund të dëmtojnë lëkurën e tyre.

Sipas tyre, ata po ushtrojnë presion mbi prindërit e tyre për t’u blerë produktet që duan. Dermatologët shprehën shqetësimin se trendi, i nxitur kryesisht nga produkte që shohin në mediat sociale, i ka lënë fëmijët “të fiksuar pas plakjes”.

 Ekspertët rekomandojnë një rutinë të thjeshtë të kujdesit për lëkurën në moshë të re, si pastrimi dhe përdorimi i kremit ​​kundër diellit nëse rrezet UV janë të larta.

Mjekja Emma Wedgeworth, e Grupit Britanik të Dermatologjisë Kozmetike, tha se kishte përvojë në këtë trend si në aspektin profesional ashtu edhe personal si nënë e një vajze 12-vjeçare.

“Është diçka që e shoh gjatë gjithë kohës në punë dhe si nënë është diçka me të cilën po luftoj gjithashtu. Unë kam një interes për kushtet e lëkurës së adoleshentëve dhe shoh shumë adoleshentë të sjellë nga prindërit e tyre që përdorin rutina të shtrenjta dhe të gjera të kujdesit të lëkurës“, tha Wedgeworth.

Mjekja Anjali Mahto, një dermatologe tha se ajo po e shihte trendin më shpesh në klinikat e saj.

“Shumica janë ndikuar shumë nga mediat sociale, veçanërisht TikTok dhe influencerat që po tregojnë rutinat e tyre, të shoqëruara më shpesh nga markat luksoze të kujdesit të lëkurës. Shpesh ka një fokus jo të shëndetshëm. Përdorin vitamina C, vitamina A (retinoidet) dhe acide eksfoliuese si AHA dhe BHA. Ato nuk janë të nevojshme për lëkurën e tyre dhe mendoj se aspekti psikologjik i fillimit të një rutine ‘anti-plakje’ tek një moshë kaq e re është e dëmshme. Fatkeqësisht po shoh më shumë adoleshentë në klinikën time që janë të fiksuar pas plakjes. Është shqetësuese dhe padyshim është nxitur nga mediat sociale”, tha ajo./ The Guardian

/rtsh.al/