Human Rights Watch e ka konsideruar krim lufte sulmin rus ndaj një stacioni treni në qytetin lindor të Ukrainës Kramatorsk prillin e kaluar. Sipas raportit të publikuar nga kjo organizatë bëhet e ditur se sulmi ndaj qindra pasagjerëve përfshirë edhe fëmijë është sulm ndaj njerëzve të pafajshëm.

Mbi 50 persona, midis tyre pesë fëmijë, vdiqën në sulmin në stacionin hekurudhor Kramatorsk më 8 prill 2022, që në atë kohë po përdorej për të strehuar civilët që iknin nga luftimet.

Sipas raportit, civilët po prisnin në stacion kur “një raketë balistike shpërtheu dhe lëshoi dhjetëra bomba”.

Konventa e Kombeve të Bashkuara për Municionet Thërrmuese (CCM) i ndalon municionet thërrmuese për shkak të “ndikimit të tyre mbi civilët”, por as Rusia dhe as Ukraina nuk janë shtete palë në këtë traktat.

“Komandantët rusë përgjegjës për urdhërimin e sulmit, i cili përdori një armë në thelb pa dallim në një qendër të mirënjohur kryesore evakuimi, duhet të hetohen dhe të mbahen përgjegjës”, vijon raporti.

Ndërkaq, Ministria ruse e Mbrojtjes mohon sulmin ndaj civilëve, pavarësisht provave të shumta të mbledhura nga mediat ndërkombëtare dhe grupet mbikëqyrëse.

/rtsh.al/