Presidenti i Azerbajxhanit, Ilham Aliyev, ka thënë se Armenia do të mbajë përgjegjësi para gjykatave ndërkombëtare për të gjitha dëmet dhe shkatërrimet e kryera në territoret e Azerbajxhanit që ka mbajtur nën okupim për 30 vitet e fundit, raporton Anadolu Agency.
Këtë të martë Aliyev vizitoi provincat Fuzuli dhe Jabrayil, të cilat u çliruan nga okupimi armen. 
Aliyev  mori pjesë në ceremoninë e hedhjes së gurëthemelit për rrugën e re që do të ndërtohet midis Fuzulit dhe Shushas.
Duke deklaruar se dëmi i shkaktuar nga armenët në rajon gjatë viteve do të llogaritet dhe të drejtat e viktimave do të kompensohen nga shteti, Aliyev tha se njerëzit më në fund do të kthehen në atdheun e tyre.
Ai shtoi se në vendet e çliruara nga pushtimi, mund të dëshmohet egërsia e lënë pas nga ata që u larguan nga territori pas viteve të okupimit.
“Ata shkatërruan të gjitha ndërtesat dhe të gjithë infrastrukturën. Prandaj, ata do të mbajnë përgjegjësi përpara gjykatave ndërkombëtare. Do të vijnë ekspertë ndërkombëtarë, do të llogaritet i gjithë dëmi që na është bërë në 30 vjet. Ata menduan se populli azerbajxhanas nuk do të kthehej më këtu. Prandaj shkatërruan gjithçka. Por ata gabuan. Ne u kthyem. Ne do ti rindërtojmë të gjitha këto vende”, përfundoi Aliyev.
Presidenti azerbajxhanas më pas vizitoi qytetin Fuzuli, ku, para një ndërtese, ai fillimisht puthi dhe pastaj ngriti flamurin e Azerbajxhanit.
Gjatë vizitës së tij në qytetin Gabriel, Aliyev edhe një herë uroi të gjithë popullin e Azerbajxhanit, duke thënë se Malësia e Karabakut i përket Azerbajxhanit.
Ndërkohë Azerbajxhani dhe Armenia shkëmbyen trupat e 200 të vdekurve që kanë humbur jetën në rajonin e Nagorni-Karabakut.
Sipas një njoftimi të bërë nga kreu i Komitetit Ndërkombëtar të Kryqit të Kuq, Peter Maurer trupat janë shkëmbyer në prani të paqeruajtësve ruse
Më shumë se 1.000 njerëz janë vrarë në një konflikt gjashtë-javor midis Azerbajxhanit dhe Armenisë.