Ndërsa aplikimet e fermerëve për përfshirje në skemën kombëtare të mbështetjes në bujqësi e blegtori vazhdojnë me intensitetit, Ministrja e Bujqësisë dhe Zhvillimit Rural Frida Krifca ka dhënë më shumë hollësi rreth përfitimeve. 

Sipas saj fermerët blegtorë me jo më pak se 100 krerë dele e dhi në vlerë deri në 1200 lekë/krerë, përfitojnë deri 360 mijë lekë për subjekt.

Referuar statistikave të Ministrisë së Bujqësisë dhe Zhvillimit Rural, në vitin 2022, u rrit me 20% numri i fermave blegtorale me mbi 200 krerë të imta, krahasuar me vitin 2021.

Në vitin 2022 u shënuan 3 030 ferma blegtorale me mbi 200 krerë të imta, kundrejt 2 528 fermave që ishin në vitin 2021.

Gjithashtu, gjatë vitit 2022 u rrit me 68% numri i fermave blegtorale të licencuara. 

47 ferma të reja blegtorale u regjistruan nga AKVMB në 2022, ndaj 28 fermave të reja që u licencuan në vitin 2021.

Në mbështetje të këtij sektori, është shtuar nga viti në vit dhe fondi nga buxheti i shtetit për subvencionimin e blegtorëve.

Kjo ka sjellë dhe rritjen e interesimit. Vetëm në ditën e parë të hapjes së Skemës Kombëtare të Mbështetjes në Bujqësi, pati 15,591 aplikime, një shifër rekord dhe tregues i qartë i besimit të shtuar të fermerëve. 

/ rtsh.al /