Administrata e Presidentit Donald Trump i ka kërkuar Gjykatës së Lartë të SHBA-së të ndërhyjë për të hequr mbrojtjet nga deportimi për rreth 6,000 sirianë që jetojnë në Shtetet e Bashkuara.

Departamenti i Drejtësisë, në një kërkesë emergjente të paraqitur të enjten kërkon që Gjykata e Lartë të anulojë vendimin e një gjyqtari në nëntor që bllokoi përpjekjen e administratës për të përfunduar Statusin e Mbrojtur të Përkohshëm për sirianët, ndërsa vazhdon gjykimi i sfidave ligjore.

Kjo është hera e tretë që administrata i drejtohet Gjykatës së Lartë për çështje të ngjashme lidhur me përfundimin e mbrojtjeve TPS për migrantë.

Në dy rastet e mëparshme, Gjykata vendosi në favor të administratës, duke lejuar revokimin e TPS-së për qindra mijëra venezuelianë.

TPS është një status humanitar sipas ligjit amerikan për migrantët nga vende të goditura nga lufta, fatkeqësi natyrore ose katastrofa të tjera. Ai i mbron njerëzit nga deportimi dhe u lejon të punojnë ligjërisht në SHBA.

Departamenti i Sigurisë Kombëtare nën administratën Trump ka lëvizur për të përfunduar TPS-në për 12 vende, përfshirë Sirinë.

Vendime të ngjashme gjyqësore kanë bllokuar përkohësisht përfundimin e TPS-së për qytetarë nga vende si Etiopia, Sudani i Jugut, Haiti, Siria dhe Mianmari.

Vendimi për të përfunduar TPS-në për Sirinë u njoftua nga Sekretarja e Sigurisë Kombëtare Kristi Noem vitin e kaluar, duke argumentuar se rënia e regjimit të Bashar al-Assad-it dhe ndryshimet në Siri (përfshirë marrëdhëniet e reja diplomatike) e bëjnë të panevojshme mbrojtjen.

/rtsh.al/