Izmir Smajlaj ka bërë një rikthim triumfues pas atim dëmtimi që e mbajti për rreth gjashtë muaj larg pistës së kërcimit. Atleti shkodran ka arritur të marrë medalje ari në Mitingun Ndërkombëtarë të Vjenës, në salla të mbyllura. Në kërcim së gjati Smalaj vendos 7.90 m në këtë eveniment të parë për vitin 2021, ndërkohë që në vazhdim e presin dhe shumë evenimente të tjera, mes të cilave dhe Lojërat Olimpike të Tokios.

Në një lidhje direkte me emisionin “Rubrika Sportive” në Radio Tirana, atleti shkodran ka deklaruar: “Mund të them se ishte një rezultat i pritshëm për mua, në fakt prisja më shumë. Në stërvitje jam paraqitur edhe më mirë. Gjithsesi, jam i kënaqur me rezultatin, duke marrë në konsideratë dhe dëmtimin që kam kaluar”.

“Do të nisem për Turqi ku do të zhvilloj një fazë përgatitore. Përpara është Kampionati Ballkanik, më pas një miting po në Stamboll. Më pas është edhe Kampionati Europian”.

“Unë shpresoj dhe premtoj të kërcej mbi 8 metra, premtoj thyerjen e rekordit kombëtar dhe ti afrohem sa më shumë normës olimpike”.