Ish-zëvendësministri i Brendshëm dhe njëherësh ish-drejtori i Përgjithshëm Agjencisë së Kthimit dhe Kompensimit të Pronave, Avenir Peka ka treguar për emisionin ‘3D’ në RTSH 1 se si e ktheu mbrapsht dhëndrin e Berishës në vitin 2012 teksa i ishte paraqitur me dosje në dorë për të privatizuar kompleksin e klubit sportiv “Partizani”.

“Dosjen e 64 trashëgimtarëve, kur unë kam qenë kryetar i agjencisë së kthimit dhe kompensimit të pronave unë e kam kthyer mbrapsht.

E kam konsideruar negative në vitin 2012. Jamabër Malltezi që ka përdorur vjehrrin e vet, gjithë shtetin për të marrë këto prona, mua që më ka emëruar Sali Berisha nga zëvendësministër të Brendshëm në drejtor të përgjithshëm Agjencisë së Kthimit dhe Kompensimit të Pronave ka ardhur Jamarbër Malltezi me dosje në dorë e kam kthyer mbrapsht dhe i kam thënë, nuk ke letra”, është shprehur Peka.

Ai shtoi se “nuk është padrejtësi pse është dhënë shpejt. Fakti që e ka marrë shpejt apo avash është çështje administrative, nuk është as çështje civile dhe as penale”.

Më herët, Peka vlerësoi se në lidhje me masat e dhëna nga gjykata nuk është respektuar kriteri kushtetues. Sipas tij, Komisioni i Mandateve duhet të thërriste prokurorët dhe personin për të cilin është bërë kërkesa ose për të cilin është marrë masa kufizuese, gjë që s’ka ndodhur, duke përbërë edhe një shkelje të partimit kushtetues.

“Pse Prokuroria nuk e çoi në parlament për të vendosur atë masë? Përgjigja është e thjeshtë. Arsye politike. Është një dokument i shpërndarë me qëllim nga prokuroria, 200 faqe material. Unë arrita në konkluzionin që ky raport është si një vendim i formës së prerë.

U shpërndanë që gjyqi të bëhet në publik. Edi Rama nuk guxon, kështu interpretoj unë. Para se të bëhet debat ligjor të bëhet debat publik.  

Debati që shtrohet është politikë nga njëra anë, por edhe debat ligjor për anën proceduriale. Ne e dimë që nëse shkon në Kuvend mazhoranca e ka shumicën dhe e voton.

Pse u shmang? Unë mendoj se mazhoranca e ka shmangur debatin politik sepse numrat i ka pasur”, theksoi Peka në emisionin ‘3D’ në RTSH.

/rtsh.al/