Kryetari i Grupit Parlamentar të Partisë Demokratike, Gazment Bardhi, në një prononcim për mediat, në përfundim të seancës në Kuvend, i komentoi emrat e ministrave të rinj në qeveri, si “individë anonimë, jo përfaqësues të interesit publik”.

Sipas tij, të tre ministrat, janë individë të “keqpërdorur” në pozicionet e tyre në administratë dhe tashmë po promovohen në kabinetin qeveritar.

“Nga sot krimi i organizuar është edhe më i fuqishëm në qeverisjen e vendit. Në mënyrë të drejtpërdrejtë është Edi Rama që ka diktuar të tre emërimet e reja në kabinetin qeveritarë. Ata janë  individë anonimë, që ishin keqpërdorur në pozicionet e tyre administrative deri më sot”, tha Bardhi.

Sipas tij, për opozitën nuk ka asnjë dallim mes Elisa Spiropalit në pozicionin e Kryetares së Kuvendit, dhe Lindita Nikollës.

“Për ne nuk ka asnjë dallim mes Nikollës dhe Spiropalit. Edi Rama kontrollon gjithçka. Deputetët e tyre i trajtojnë si kartona që ngrihen dhe ulen, jo si përfaqësues të interesit publik”, tha Bardhi.

/rtsh.al/