Ish-kryeministri, Sali Berisha ka reaguar mbi vendimin e Serbisë për lirimin e 3 policëve kufitarë të Kosovës, ku e konsideroi një vendim të drejtë. Berisha vuri theksin te nevoja për zbardhjen e së vërtetës dhe ndëshkimin e organizatorëve dhe ekzekutorëve të asaj që e cilësoi si aktin e pashembullt, për arrestimin e policëve të Kosovës.

“Falenderojmë SHBA, BE, NATO dhe kryeministrin Orban të cilët kërkuan lirimin pa kushte dhe të menjëhershëm të policëve shqiptarë të Kosovës.

Sigurisht që, lirimi i tyre ishte një vendim në drejtimin e duhur, por zbardhja e së vërtetës mbi këtë akt dhe ndëshkimi i organizatorëve dhe ekzekutorëve të këtij akti të pashembullt nga vitet ’50 deri më sot është i domosdoshëm në ,mënyrë që histori të tilla të mos përsëriten më”, tha Berisha.

Ish-kryeministri i drejtoi një thirrje autoriteteve të Kosovës që të bëjnë përpjekje për çtensionimin e situatës dhe rikthimin te dialogu me Serbinë.

“Unë i bëj thirrje autoriteteve të Kosovës, duke mbështetur plotësisht të drejtën e tyre për vendosjen e ligjit, rendit dhe sigurisë në gjithë territorin e tyre. Të bëjnë përpjeke për çtensionimin e situatës, rikthimin te dialogu dhe marrëveshja e Ohrit”, tha Berisha.

/rtsh.al/