Presidenti amerikan Donald Trump i është përgjigjur deklaratave të fundit të aktorit Robert De Niro, i cili në një podcast e quajti atë “idiot”.

Gjatë episodit të së hënës të podcastit “The Best People with Nicole Wallace”, De Niro, kritik i hershëm i Trump-it, tha: “Ai është një idiot. Duhet ta heqim qafe. Do ta shkatërrojë vendin”. Ai shtoi se nuk dëshiron që vetëm mbështetësit e lëvizjes Maga të shfaqen si “amerikanët e vërtetë”, duke theksuar se “ne jemi amerikanë gjithashtu”.

Aktori më pas mori pjesë në aktivitetin “State of the Swamp” në Uashington, të organizuar si kundërpërgjigje ndaj fjalimit të presidentit para Kongresit. Në një fjalim emocional, De Niro e përshkroi Trump-in si “të dështuar, të çoroditur dhe të dëshpëruar”, duke shtuar se ndihej i tradhtuar nga vendi i tij.

Në një reagim të gjatë në rrjetin e tij social Truth Social, Trump sulmoi fillimisht dy kongresistet Ilhan Omar dhe Rashida Tlaib, të cilat kishin ndërprerë fjalimin e tij. Ai i quajti ato me “IQ të ulët” dhe përdori gjuhë fyese ndaj tyre.

Më pas ai iu kthye De Niros, duke e quajtur “të sëmurë dhe të çmendur”, me “IQ jashtëzakonisht të ulët”, dhe duke pretenduar se aktori “nuk ka asnjë ide se çfarë po bën apo thotë”. Trump shtoi se kur e pa De Niron “duke shpërthyer në lot si një fëmijë”, mendoi se ai mund të ishte “edhe më i sëmurë” se Rosie O’Donnell, të cilën ai e përmendi gjithashtu në postimin e tij.

Shprehja “Trump derangement syndrome” është përdorur shpesh nga presidenti për të përshkruar kundërshtarët e tij politikë.

Pak para rizgjedhjes së Trump-it në vitin 2024, De Niro kishte deklaruar në një intervistë për HBO Max se ai dhe aleatët e tij “nuk janë republikanë të vërtetë”, duke e quajtur presidentin “një budalla, një idiot… dhe një kloun”. Edhe pse nuk është shprehur si mbështetës i fortë i Kamala Harris, aktori kishte thënë se ajo të paktën është “e ndjeshme ndaj gjendjes së vendit dhe njerëzve”.

Më herët gjatë vitit, Shoqata Kombëtare e Transmetuesve në SHBA ia hoqi De Niro-s një çmim drejtues që pritej t’i jepej, pasi ai foli kundër Trump-it jashtë gjyqit penal të këtij të fundit në Nju Jork.

POSTIMI I PLOTË I TRUMP

Kur shikon Ilhan Omar dhe Rashida Tlaib me “IQ të ulët”, teksa bërtisnin pa kontroll mbrëmë në atë State of the Union kaq elegant, një ngjarje kaq e rëndësishme dhe e bukur, ato kishin sytë e fryrë e të skuqur si njerëz të çmendur, TË ÇMENDUR, të çrregulluar mendërisht dhe të sëmurë që, sinqerisht, duken sikur duhet të shtroheshin në institucione. Kur njerëzit sillen në atë mënyrë, dhe duke ditur se janë politikanë të pandershëm dhe të korruptuar, kaq të këqij për vendin tonë, ne duhet t’i kthejmë nga kanë ardhur — sa më shpejt të jetë e mundur. Ata vetëm mund t’i bëjnë dëm Shteteve të Bashkuara të Amerikës, nuk mund të bëjnë asgjë për ta ndihmuar atë.

Ata duhet në fakt të hipin në një varkë bashkë me Robert De Niron e çmendur nga Trump, një tjetër person të sëmurë dhe të rrjedhur që, besoj unë, ka një IQ jashtëzakonisht të ulët, që nuk ka absolutisht asnjë ide se çfarë po bën apo thotë — disa prej të cilave janë seriozisht KRIMINALE! Kur e pashë mbrëmë duke shpërthyer në lot, ashtu siç do të bënte një fëmijë, kuptova se ai mund të jetë edhe më i sëmurë se Rosie O’Donnell “e çmendur”, e cila tani ndodhet në Irlandë duke u përpjekur të kuptojë si të kthehet në Shtetet tona të bukura të Bashkuara. I vetmi ndryshim mes De Niros dhe Rosie është se ajo ndoshta është disi më e zgjuar se ai, gjë që nuk do shumë koment.

Lajmi i mirë është se Amerika tani është më e Madhe, më e Mirë, më e Pasur dhe më e Fortë se kurrë më parë, dhe kjo po i çmend ata plotësisht!

PRESIDENTI DONALD J. TRUMP