Zyrtarët e SPAK dhe pjesëtarët e ekipit të OPDAT-it në Ambasadën e SHBA-së kanë vijuar takimet në Uashington. Kreu i SPAK, Altin Dumani ka zhvilluar takime në Byronë Federale të Hetimit, në Seksionin e Rikthimit të Aseteve të përftuara nga Pastrimi i Parave në Departamentin e Drejtësisë, si dhe në Departamentin e Thesarit.

Po ashtu, Dumani u takua me Ndihmës Sekretarin e Shtetit për Çështjet Ndërkombëtare të Narkotikëve dhe Zbatimit të Ligjit Todd D. Robinson, Ndihmës Sekretarin e Shtetit për Çështjet Evropiane dhe Euroaziatike Xhejms Obrajan (James O’Brien) dhe ish-ambasadoren amerikane Yuri Kim.

Në fjalën e tij gjatë takimit, Obrajan ka shprehur mbështetjen e Shteteve të Bashkuara të Amerikës në lidhje me reformën në drejtësi, që sipas tij, është thelbësore për integrimin e Shqipërisë në Bashkimin Evropian. “I kënaqur që u takova me kreun e SPAK-ut, Altin Dumani. Mbresëlënëse të shohësh reformën në drejtësi që jep rezultate reale për popullin shqiptar

SHBA mbështet fuqishëm reformën në drejtësi, e cila është thelbësore për të ardhmen e Shqipërisë në BE”, tha ai.

Grupi do të vazhdojë udhëtimin studimor me takime të tjera në Departamentin e Shtetit të SHBA, Departamentin e Drejtësisë dhe Administratën kundër Narkotikëve (DEA).

/rtsh.al/