Analisti Arjan Curi, në emisionin ‘3D’ në RTSH, në analizën për vajtjen e Presidentit në Kuvend dhe pamundësisë së tij për të folur, u shpreh se nisma ishte e mirë, pasi ai dukej se donte të shuante zjarret, por nuk gjeti momentin e duhur.

“Presidenti u mundua të fikte zjarrin. Këshilltarët nuk e kanë këshilluar mirë për shkak të momentit që ai zgjodhi. Nisma e tij ishte e sinqertë, por e paduhur për momentin. Ai duhej të bënte lëvizjen e fundit, jo të ishte i pari. Bardhi i ka bërë apel të mos shkojë në Kuvend. Zjarri nuk shuhet vetëm se shkon Presidenti në Kuvend. Më dhembi rrëzimi i autoritetit të Presidentit sepse ngeli në paradhomën e Nikollës. Mbase ka strategjinë që të dalë jashtë loje dhe ai tani e ka justifikimin. Thotë: unë erdha, ju s’më latë.  Nuk ishte momenti i duhur që ai të shkonte në Kuvend.”, tha Curi.

/rtsh.al/