Presidenti francez Emmanuel Macron, ka premtuar se Franca, së shpejti, do të dërgojë më shumë topa, radarë dhe raketa kundërajrorë, për të mbështetur Ukrainën.

Macron tha për televizionin France 2 se Franca po punon me Danimarkën për të dërguar gjashtë topa vetëlëvizës, të cilat fillimisht ishin prodhuar për ushtrinë daneze. Parisi i dorëzoi Kievit 18 topa të ngjashëm.

Franca do të dërgojë edhe “sisteme dhe raketa kundërajrore”, për të ndihmuar në mbrojtjen e Ukrainës nga sulmet me dron dhe raketa. Macron këmbënguli disa herë në nevojën e bisedimeve për paqe mes dy vendeve.

Presidenti rus Vladimir Putin duhet “të përfundojë luftën, të respektojë integritetin territorial të Ukrainës dhe të kthehet në tryezën e diskutimit”, tha ai, duke shtuar se do të flasë me presidentin rus “sa herë që do të jetë e nevojshme”.

“Shpresoj se sa më shpejt të jetë e mundur, do të kemi nevojë që të gjitha palët të kthehen në tryezën e diskutimit, dhe të ketë diskutime për paqen, nga njëra anë, Ukraina dhe nga ana tjetër, Rusia”, tha ai.

I pyetur nëse ai mendon se Ukraina do të jetë e gatshme të negociojë me Rusinë, ai tha se “negocimi nuk do të thotë të heqësh dorë”. Apnews

/rtsh.al/