Fluturimet nga dhe për në Greqi janë anuluar këtë të enjte, (16 mars) ndërsa anijet kanë mbetur në porte pasi punëtorët grekë kanë lënë punë për të protestuar mbi përplasjen e trenave që u mori jetën 57 personave në datën 28 shkurt.

Shërbimet publike dhe shkollat shtetërore janë mbyllur gjithashtu. Grevës i janë bashkuar edhe shoferët e taksive dhe stafi i metrove. Që nga përplasja, punonjësit e hekurudhave kanë zhvilluar një sërë grevash. 

Protestuesit, duke akuzuar qeverinë konservatore dhe sistemin politik të vendit, se kanë bërë veshin e shurdhër ndaj thirrjeve të vazhdueshme të sindikatave për dobësi në sistemin e sigurisë së hekurudhave u mblodhën në qendër të Athinës.

“Shpreh zhgënjim për çfarë nuk ka ndodhur përgjatë viteve, por veçanërisht për atë që ndodhi në Tempi”, u shpreh  sindikata GSEE e sektorit privat, duke kërkuar një hetim të gjithanshëm për shkaqet e përplasjes. 

Një hetim gjyqësor për aksidentin ndërkohë po vijon. Përplasja vdekjeprurëse e dy trenave ka shkaktuar zemëratë publike.

Javën e shkuar dhjetëra mijëra persona u mblodhën në Athinë dhe qytete të tjera në demostratat më të mëdha të zhvilluara që nga zgjedhja e qeverisë aktuale në 2019.

Fajtorët duhet të paguajnë pavarësisht rangut, shkruhej një një banderolë. 

Kryeministri Kiriakos Mitsotakis, mandati i të cilit përfundon në muajin korrik, ka kërkuar falje për përplasjen dhe ka premtuar se do të punësojë më shumë staf dhe do të rregullojë sektorin hekurudhor, me mbështetjen e Bashkimit Europian. Ai gjithashtu iu ka kërkuar protestuesve që të mos lejojnë që zemërimi të përçajë shoqërinë.

“Duhet ta fitojmë këtë luftë,” u shpreh Mitsotakis, duke shtuar se ishte i vendosur të eliminonte faktorët që çuan në tragjedi.

Gazetare: Elda Pepa
/rtsh/