Ish-zëvendëspresidenti amerikan, Mike Pence, është thirrur nga këshilltari special që mbikëqyr hetimet mbi përpjekjet e ish-presidentit, Donald Trump, dhe aleatëve të tij, për të përmbysur rezultatet e zgjedhjeve të vitit 2020. Kjo u bë e ditur sipas një personi me njohuri të drejtpërdrejta mbi çështjen.

Thirrja ndaj Pence, si pjesë e hetimit nga këshilltari special, Jack Smith, u dorëzua ditët e fundit, sipas të njëjtit person, i cili foli me Associated Press në kushte anonimiteti.

Ky duket një skenar i jashtëzakonshëm, ku një ish-zëvendëspresident mund të dëshmojë kundër ish-shefit të tij në një hetim penal. Kjo vjen në kohën që Pence po konsideron të publikojë ofertën e tij presidenciale për republikanët në vitin 2024, kundër Trump. 

Të dy janë ndarë, që kur një turmë mbështetësish të Trumpit sulmuan ndërtesën e Kapitolit të SHBA më 6 janar 2021, në një përpjekje për të ndaluar fitoren e demokratit, Joe Biden.

Thirrja është një hap më agresiv nga një prokuror, i cili për vite ka drejtuar seksionin kundër korrupsionit publik në Departamentin e Drejtësisë dhe që po mbikëqyr paditë kundër figurave kryesore politike. 

Është e paqartë nëse përpjekjet për të siguruar dëshmi vullnetare nga Pence kishin mbetur në vend përpara se të lëshohej thirrja nga ana e hetuesit special. Zëdhënësit e Pence dhe Smith nuk pranuan të komentojnë për lëshimin e fletëthirrjes, e cila u raportua fillimisht nga ABC Neës.

Pence ishte një figurë qendrore në përpjekjet e Trump për të qëndruar në pushtet pas humbjes së zgjedhjeve në vitin 2020. Trump këmbënguli në mënyrë të rreme që zëvendëspresidenti i tij, i cili kishte një rol ceremonial në mbikëqyrjen e certifikimit të zgjedhjeve, thjesht mund t’i refuzonte rezultatet dhe t’i kthente ato në shtetet që ai kontestonte.

Më 6 janar, mbështetësit e Trump, të shtyrë nga gënjeshtra se zgjedhjet ishin vjedhur, marshuan drejt ndërtesës së Kapitolit, kaluan brutalisht policinë dhe thyen dritaret e dyert, ndërsa Pence po kryesonte certifikimin e fitores së Biden. Apnews

/rtsh.al/