Zëdhënësi i Ministrisë së Jashtme iraniane Nasser Kana’ani ka reaguar për zhvillimet e fundit në bazën e organizatës terroriste Mojahedin-e Khalq në Manëz dhe ka nënvizuar se Shqipëria duhet t’i marrë seriozisht kërcënimet e MEK-ut.

Sipas Ministrisë së Jashtme iraniane përbëjnë kërcënim për sigurinë e Shqipërisë për shkak të natyrës dhe mënyrës së grupimit të tyre.

“Elementët e grupit terrorist anti-Iran Mojahedin-e Khalq (MKO i njohur gjithashtu si MEK, NCRI ose PMOI) do të përbëjnë gjithmonë një kërcënim për sigurinë e mikpritësit të tyre për shkak të natyrës së tyre terroriste”, shkroi në Twitter, zëdhënësi i Ministrisë së Jashtme, Kana’ani.

Sipas Ministrisë së Jashtme iraniane, kjo është edhe arsyeja se pse qeveria irakiane i dëboi dhe qeveritë e tjera refuzuan t’i pranonin.

“Shpresojmë që qeveria shqiptare të korrigjojë gabimin e saj në pritjen e këtyre terroristëve”, ka theksuar ai.

Policia shqiptare ushtroi dje një kontroll të gjerë në kampin e Muxhahedinëve në Manëz pasi dyshohet se ata janë përfshirë në sulme kibernetike kundër institucioneve sbhqiptare.

Policia hasi në rezistencën e banorëve të këtij kampi, ku një person mbeti i vdekur dhe dhjetëra të tjerë u plagosën.

Forcat e policisë ndërhynë në kamp pas vendimit të Gjykatës së Posaçme Kundër Krimit dhe Korrupsionit (SPAK) që autorizoi operacionin për shkak të shqetësimeve se MEK ishte përfshirë sulme kibernetike.

/rtsh.al/