Ish-kryetari i Bashkisë së Bulqizës, Lefter Alla ka kërkuar sërish lirinë në GJKKO për shkak të gjendjes shëndetësore. Avokati me të cilin përfaqësohet Alla, ka dorëzuar në seancë provat nga ekspertë mjeko-ligjorë lidhur me gjendjen e tij. 

Seanca ndaj Allës është shtyrë për më 29 korrik në orën 13:30.

Gjykata e Apelit e GJKKO, vendosi më 16 qershor që të linte në burg ish-kryebashkiakun e Bulqizës, duke lënë në fuqi vendimin e shkallës së parë, ndonëse Alla kishte kërkuar një masë më të lehtë sigurie, me pretendimin se gjendja e tij shëndetësore ishte e rënduar.

Alla u shkarkua nga detyra nga kryeministri Edi Rama, për shkelje të rënda, pas arrestimit nga SPAK për abuzimet me tenderat publikë, duke favorizuar kompanitë e të afërmve të tij.  Ai, bashkë me 12 persona të tjerë, 7 prej tyre zyrtarë të bashkisë, ranë në pranga për abuzimin me një tender me vlerë 3 mln euro.

/rtsh.al/