Kryetarja e LSI në opozitë, Monika Kryemadhi, u ka bërë thirrje të rinjve shqiptarë të reagojnë kundra realitetit ku jetojnë, ndërsa ka premtuar se partia e saj do të jetë gjithmonë pranë tyre si një mundësi për të ngritur zërin. “Të rinjtë, përkundrazi, duhet të reagojnë dhe mënyrën për të reaguar e kanë shumë të thjeshtë: Të marrin në dorë fatet e tyre! Të bëhen pjesë e vendimmarrjes dhe që të bëhesh sot pjesë e vendimmarrjes, nuk do të thotë të përkrahësh një kryetar partie, por do të thotë që të kesh vizion, të kesh ide dhe t’i realizosh ato!” tha zonja Kryemadhi në një takim me të rinj tek Korpusi i Universitetit të Tiranës. 
“LSI-ja do të jetë foltorja juaj, jo vetëm për folur dhe për të ngritur zërin, por do të jetë foltorja juaj për të marrë vendimet tuaja, për t’u përfshirë në vendimmarrje, për t’u përfshirë në hartimin e politikave, për të ndryshuar këtë realitet të hidhur dhe për të ecur përpara” tha zonja Kryemadhi.