Kryeministri Edi Rama priti sot në kryeministri Presidentin e Lituanisë, Gitanas Nausėda, i cili ndodhet për një vizitë zyrtare në Shqipëri.

Sipas njoftimit nga Kryeministria, takimi u fokusua tek forcimi i marrëdhënieve mes dy shteteve, mbështetja e Lituanisë për procesin e anëtarësimit të Shqipërisë në Bashkimin Europian dhe zgjerimi i BE-së me vendet e Ballkanit Perëndimor gjatë Presidencës së Lituanisë në Këshillin e BE-së në gjashtëmujorin e parë të vitit 2027. 

Më herët gjatë ditës, Presidenti i Lituanisë, Gitanas Nausėda, u prit nga Presidenti i Republikës, Bajram Begaj.

Në këtë takim u theksua vullneti i përbashkët për forcimin e marrëdhënieve dypalëshe dhe zgjerimin e bashkëpunimit konkret në dobi të qytetarëve të të dy vendeve.

Diskutimet u përqendruan tek mbështetja për Kosovën dhe rruga e Shqipërisë drejt BE-së, ndërsa të dy presidentët konfirmuan se si vende anëtare të NATO-s ndajnë të njëjtin vizion për sigurinë euroatlantike dhe do të vijojnë të kontribuojnë për paqen e stabilitetin në rajon dhe më gjerë.

/rtsh.al/