Mëngjesin e kësaj të enjte (6 korrik) janë dorëzuar në Ministrinë e Jashtme të Kosovës 13 marrëveshjet e mbledhjes së përbashkët të dy qeverive Prishtinë-Tiranë, të firmosuara nga pala shqiptare.

Kryeministri Rama teksa ka bërë me dije lajmin, shprehet se me kundërfirmosjen e palës kosovare, 13 marrëveshjet hyjnë menjëherë në fuqi.

“Pas pak drejt Shkupit për të nisur vizitën dyditore në kryeqytetet e Ballkanit Perëndimor. Sot të mëngjes janë dorëzuar në ministrinë e jashtme në Kosovë të 13 marrëveshjet e mbledhjes së dy qeverive të firmosura nga ana jonë.

Me kundërfirmosjen e palës kosovare ato hyjnë menjëherë në fuqi. Mbetem me shpresë se pas heqjes së merakut të shprehur publikisht nga KM Kurti për qytetarët e penguar të përfitojnë nga 13 marrëveshjet, do të kemi edhe konfirmimin e takimit me Albinin sot pasdite”, shkruan Rama në rrjetin social Twitter.

Reagimi i sotëm nga Kryeministri erdhi një ditë pas deklaratave të artikuluara një ditë më parë (5 korrik) nga Kryeministri Albin Kurti, u cili tha se do të takohet me Ramën në rast se mbahet mbledhja e përbashkët e dy qeverive dhe nënshkrimi i 13 marrëveshjeve të cilat mbetën pezull nga anulimi i mbledhjes së mëparshme.

Sakaq, Kryeministri Rama nis sot turin ballkanin në kuadër të procesit për Samitin e Berlinit, ku sikurse u bë me dije në axhendën e kreut të qeverisë shqiptare, ky i fundit mbetej në pritje për konfirmimin e takimit me homologun e tij nga Kosova.

/rtsh.al/