Përmeti është i njohur në mbarë Shqipërinë e më gjerë për mikpritjen dhe gatimet tradicionale. Prodhimi I produkteve artizanale është një traditë e hershme e trashëguar brez pas brezi .  Një ndër to është edhe llokumja e bajames, e cila është një traditë e artizaneve Përmetare që e kanë sjellë që nga shekujt e kaluar deri  në ditët e sotme. Nuk ka festë pa prezencën e llokumes së bajames në tryezat Përmetare. Eftali Qerimi ka rreth 40 vite që e përgatit këtë produkt që personifikon gëzimet familjare.

“Nuk ka familje përmetare që të bëjë një festë familjare dhe të mos përdori llokumin e bajames”, tha artizania.

Artizania Përmetare  na tregon procesi e përgatitjes se llokumes së bajames. Ajo thotë se  duhen vetëm  tre përbërës kryesor siç janë, bajamet, uji i trëndafilit dhe sheqerin pluhur.

“E valojmë ujin marrim bajamen e hedhim në ujë të nxehtë dhe pastaj e qërojmë një për një i thajmë dhe i shtypim bajamet sa nxjerrin vajin e tyre dhe marrim sheqerin pluhur”, tha artizania.

Në përgatitjen e kësaj ëmbëlsire, artizania cilëson më të vështirë procesin nxjerrjes së  ujit të trëndafilit.

“Uji i trëndafilit ka shumë mundime duhet të ketë thesin lino, duhet të vlojë në prush”, tha artizania Eftali Qerimi.

Sipas gojëdhënave të paraardhësve të tyre llokumja e bajamtë dhe glikoja janë përdorur të dyja  njëkohësisht nga gjyshet e nënat, dhe e njëjta gjë po praktikohet edhe në ditët e sotme.

Ky produkt i cili përdoret në çdo familje Përmetare vitet e fundit ka marrë përmasa të tjera përtej qytetit dhe zonës së Përmetit. Kjo jo vetëm  për shijen e veçantë që ka, por edhe  për vlerat  e larta ushqyese. Siç e pohoj edhe Zonja Eftali Qerimi kjo traditë do vazhdoj për  shumë gjatë, pasi gratë Përmetare këtë pasion për gatimet e zonës ua kanë mësuar edhe brezit të ri.

Gazetar E. Dyrmishi

/RTSH/