Ministri i Punëve të Brendshme, Xhelal Sveçla ka deklaruar se Kosova vazhdon të renditet e para në Ballkanin Perëndimor për nivelin e sigurisë.

Duke iu referuar raportit “SecuriMeter 2025” të Këshilli për Bashkëpunim Rajonal (RCC), ministri i Punëve të Brendshme theksoi se Kosova ka nivelin më të lartë të perceptimit të sigurisë personale në rajon.

Sipas tij, 64% e qytetarëve janë shprehur se ndihen “shumë të sigurt” ose “mjaft të sigurt” në jetën e përditshme, përqindja më e lartë mes gjashtë vendeve të Ballkanit Perëndimor.

Sveçla e cilësoi këtë rezultat si rikonfirmim të besimit të qytetarëve ndaj institucioneve të sigurisë dhe mbrojtjes, duke theksuar se mbështetja e vazhdueshme e Qeverisë ndaj ushtrisë dhe policisë ka ndikuar në forcimin e kapaciteteve dhe rritjen e efikasitetit të tyre.

Ai shtoi se qëndrueshmëria institucionale ka ndikuar pozitivisht në rritjen e sigurisë, luftimin e fenomeneve negative dhe avancimin e progresit demokratik. Si rezultat, 80.5% e qytetarëve kanë deklaruar se nuk dëshirojnë të emigrojnë, një tregues që, sipas tij, paraqet përmirësim krahasuar me vitet e mëparshme.

Në fund, ministri përgëzoi zyrtarët e institucioneve për përkushtimin dhe profesionalizmin e treguar në shërbim të Republikës dhe qytetarëve.

/rtsh.al/