Ministria e Kulturës ka reaguar për ndarjen nga jeta të mjeshtrit të madh të skenës, Mirush Kabashi.

Ndërsa u shpreh ngushëllime familjarëve të Mirush Kabashit, Ministria e Kulturës bëri me dije se homazhet për aktorin do të mbahen ditën e mërkurë (6 dhjetor) ora 10:00-13:00 në hollin e Muzeu Historik Kombëtar.

“U nda nga jeta mjeshtri i madh i skenës, aktori Mirush Kabashi.

Ministria e Kulturës i shpreh ngushëllimet më të ndjera familjarëve dhe publikut që do t’ia ndjejë mungesën.

Homazhet do të mbahen ditën e mërkurë, datë 06.12. 2023, ora 10:00-13:00, në hollin e Muzeu Historik Kombëtar.

Qendra Kombëtare e Kinematografisë i shpreh keqardhjen dhe ngushëllimet familjarëve dhe miqve të të ndjerit”, thuhet në reagimin e Ministrisë së Kulturës.

Mirush Kabashi lindi më 17 prill 1948 në Shkodër. Ai u diplomua për Aktrim në Institutin e Lartë të Arteve në Tiranë më 1970 dhe filloi punë në teatrin “Aleksandër Moisiu” të Durrësit. Aty, vazhdoi deri në vitin 1994, duke pasur edhe rolin e drejtorit, 1991-1993. Më pas punoi në Televizionin Shqiptar, në departamentin e Programeve Artistike si ideator dhe prezantues, kurse nga 2002 e ne vijim në Teatrin Kombëtar.

Nga viti 1985, me periudha te ndërprera, është aktivizuar si pedagog i “Mjeshtërisë së Aktorit” pranë Akademisë së Arteve. 

Mirush Kabashi është aktor i rreth 100 roleve, në teatër dhe filma. Shpesh ka qenë edhe prezantues i aktiviteteve të shumta artistike. Gjithashtu, Kabashi është cilësuar si një nga interpretuesit më të mëdhenj të poezisë në Shqipëri. Ai ka dhënë një kontribut të madh në filmografinë shqiptare. E ndërsa një pjesë të jetës së tij ia ka kushtuar edhe teatrit me rolet e tij të larmishme, ku ndër to më i veçanti ka mbetur ai i Sokratit tek “Apollogjia e fundit e Sokratit”.

Mirush Kabashi, i cili në fund të vitit 2014 u nderua me titullin e lartë “Nderi i Kombit”, më parë kishte titujt “Artist i Merituar”dhe “Mjeshtër i Madh i Punës”.

Filmografia

Kronikë provinciale (2009)

Ne dhe Lenini (2008)

Nata (1998)

Edhe ashtu edhe kështu (1989) 

Binarët (film) (1987)

Telefoni i një mëngjesi (1987)

Zëvendësi i grave (1987)

Nxënsit e klasës sime (1984)

Kohë e largët (1983) 

Dora e ngrohtë (1983) 

Shoqja nga fshati (1980) 

Një ndodhi në port (1980) 

Gezhoja e Vjeter (1980) 

Radiostacioni (1979) 

Koncert në vitin 1936 (1978)

Zani partizani (1976) (TV)

Emblema e dikurshme (1976)