Presidenti amerikan Xho Bajden (o. Joe Biden) tha të dielën se ndihma amerikane për Ukrainën do të vazhdojë tani për tani, ndërsa ai u përpoq të siguronte aleatët për vazhdimin e mbështetjes financiare amerikane për përpjekjet e luftës. Por koha po mbaron, tha presidenti në një paralajmërim drejtuar Kongresit.

“Në asnjë rrethanë ne nuk mund të lejojmë që ndihma amerikane për Ukrainën të ndërpritet”, tha presidenti Bajden gjatë një fjalimi nga Shtëpia e Bardhë pas shmangies së përkohshme të mbylljes së qeverisë amerikane, shkruan Associated Press.

Masa e miratuar mbrëmjen e së shtunës siguron financimin e qeverisë deri më 17 nëntor, por nuk përfshin fonde ndihme për luftën e Ukrainës kundër agresionit rus.

Presidenti Bajden theksoi urgjencën e madhe për sigurimin e ndihmave për Ukrainën duke vënë në dukje se marrëveshja financiare zgjat deri në mes të muajit nëntor. Kreu i shtetit i kërkoi Kongresit që të negociojë një paketë ndihme sa më shpejt të jetë e mundur.

Ligjvënësit amerikanë që e mbështesin luftën e Ukrainës kundër agresorit rus thonë se nuk do të dorëzohen. Megjithatë, shumë ligjvënës e pranojnë se është bërë e vështirë që palët në Kongres të bien dakord për ndihmën për Ukrainën.

Rezistenca republikane ndaj ndihmës për Ukrainën po bëhet edhe më e madhe në Kongres. Votimi në Dhomën e Përfaqësuesve javën e kaluar nxori në pah se rreth gjysma e republikanëve votuan për heqjen e 300 milionë dollarëve nga një projektligj për shpenzimet e mbrojtjes për të trajnuar ushtarët ukrainas dhe blerë armë.

/rtsh.al/