Prodhimi i energjisë në vend/ Kaskada e Drinit mban sërish peshën kryesore

Në 8 muajt e parë të këtij viti sërish Kaskada e Drinit ka vijuar të jetë burimi kryesor i prodhimit të energjisë në vend ku nga rreth 6.2 milionë megavat orë që ishte prodhimi total në janar-gusht pjesa më e madhe i takon Korporatës Elektroenergjetike Shqiptare.
Nga të dhënat zyrtare të 8-mujorit të publikuara nga Enti Rregullator i Energjisë tregojnë se KESH ka prodhuar 59.4 për qind të sasisë së energjisë së prodhuar në vend ndërkohë që pjesa e privatëve ishte 40.7 për qind.
Hidrocentralet private të lidhur në rrjetin e transmetimit prodhuan 750 mijë Megavat orë apo 12.1 për qind të totalit, ata të lidhur në rrjetin e shpërndarjes kishin një nivel lehtë më të ulët se grupi i parë duke përbërë 11.4 për qind të totalit.
Ndërkohë grupi tjetër i privatëve që shesin në tregun e lirë, kanë prodhuar 9.35 për qind të totalit.
Viti 2023 ka qenë një vit më i mirë nga ana hidrike sesa viti paraardhës duke i dhënë kështu mundësi kompanisë publike por edhe privatëve për të pasur një prodhim më të qëndrueshëm energjie çka ka ulur edhe nivelin e importeve të cilat deri në gusht ishin minimale.
Ndërkohë gjatë shtatorit dhe tetorit KESH ka nisur blerjet në tregun e lirë për të siguruar furnizimin me energji të vendit në kushtet kur edhe nivelet e Kaskadës janë ulur por edhe optimizmit të prodhimit të saj.
Gazetare: Armela Koçerri
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Komentet 0
Ende nuk ka komente. Bëhuni i pari që komenton.




