6 vjet pas Reformës në Drejtësi, ligjet për disa nga institucionet kryesore do të ndryshojnë përsëri. 6 vjet më parë, mënyra e hartimit të këtyre ligjeve ishte çështja që ndante maxhorancën dhe opozitën, por tani nuk duket të jetë kështu. Pa shume bujë dhe pa debatet e zakonshme konfliktuale, palët kanë rënë dakord të punojnë së bashku.

“Me vendim të kryesisë së Komisionit, në vijim të raportimeve të institucioneve të pavarura dhe nevojave që ngritën institucionet e drejtësisë për disa ndryshime dhe përmirësime ligjore është ngritur një grup punë nga maxhoranca dhe opozita, i cili po punon bashkë me ekspertët, në konsultim me partnerët ndërkombëtarë për adresimin e këtyre shqetësimeve”,-tha përfaqësuese e PS në Komisionin e Ligjeve Klotilda Bushka.

Grupi i punës përbëhet nga 3 përfaqësues të Partisë Socialiste në komisionin e Ligjeve, Klotilda Bushka, Toni Gogu dhe Klevis Xhoxhi, si dhe 2 përfaqësues të opozitës, Dhurata Çupi dhe Gazment Bardhi, i cili ka qenë një nga njerëzit kyç të Partisë Demokratike, gjatë reformës në drejtësi.

 “Pasi grupi i punës të ketë një produkt, ai do të shpërndahet tek të gjithë anëtarët e komisionit para se te depozitohet si nismë ligjore“, tha Bushka.

Burime zyrtare bënë të ditur për RTSH se institucionet e drejtësisë kanë propozuar ndryshimin e 6 ligjeve nga 7 gjithsej që kishte Reforma në Drejtësi.

/rtsh/