Kreu i grupit parlamentar të Partisë Socialiste, Bledi Çuçi në një prononcim për media jashtë Parlamentit, ka deklaruar se përpjekja e opozitës për mungesë dhe rivendosje të hapësirës kushtetuese brenda Parlamentit, është demagogji. Çuçi theksoi se opozita përsëriti në Kuvend skenat e 2 nëntorit, ndonëse në rend dite në seancë plenare ishin nismat e saj.

 “U vërtetua që e gjithë përpjekja e opozitës për gjoja mungesë dhe rivendosje të hapësirës kushtetuese Brenda parlamentit është demagogji. Sot kishim për shqyrtim 6 nga nismat ligjore që ka ndërmarrë opozita brenda të drejtës së opozitës për të paraqitur nisma ligjore. Edhe për shqyrtimin e nismave të tyre ata përsëritën skenat.

Do kishim diskutuar. Qëllimi nuk është miratimi. Ne japim arsyet përse nuk duhen miratuar dhe ata japin arsyet e tyre përse duhen miratuar”, tha ai.

Çuçi u shpreh se arsyeja përse nuk u miratuan këto nisma ligjore, ka të bëjë me objektin.

“E kemi thënë që është e drejtë e padiskutueshme kushtetuese që ata të ngrejë komisione hetimore. Por e vetmja gjë që na bën të mos i miratojmë një komision parlamentar që ata kërkojnë, ka të bëjë me objektin. Vendimet vetëm njoftohen. Por njoftimi dhe tubimi do bëhet sipas kërkesave.

Në lidhje me ndryshimet e Kodit Penal, propozime si nisma ligjvënëse nga opozita, ishte i qartë qëndrimi i relatores se a ka momente ku janë qëndrime parimore ku nuk jemi dakord dhe ka momente për bërjen e një kodi të ri penal. Ministria e Drejtësisë është drejt përfundimit të draftit të ri të kodit të ri penal, që do ketë dyfishin e neneve që ka sot Kodi Penal.

Ne kemi thënë atë që ka thënë Gjykata Kushtetuese që e drejta për të kërkuar dhe ngritur komisione hetimore e opozitës nuk mund ta kthejë Parlamentin në një super organ. Ajo vlerësohet nëse në një moment të caktuar e cenon apo jo hetimin”, theksoi ai.

/rtsh.al/