Kreu i Lëvizjes për Zhvillim Kombëtar, Dashamir Shehi ka paraqitur katër pika që duhet të merren në konsideratë në mënyrë urgjente nga opozita për të dalë nga kriza e saj.

Duke folur në emisionin “3D” në RTSH1 të gazetarit Alban Dudushit, Shehi theksoi se opozita duhet të rikthehet në Parlament, të ndryshojë ligjin elektoral, të ndalojë akuzat ndaj SPAK-ut dhe të përmirësojë raportet me ndërkombëtarët.

“Cilat janë katër pikat imediate sot? Unë them që duhet të hyjmë në Parlament sepse po i mbyllim gojën vetes. Nuk po na e mbyll Edi Rama. Ky është realiteti, ai aksion që ishte atje e bëri pjesën e vet e meditizoi pjesën e vet.

Deri diku e ndërkombëtarizoi. Që të rrish jashtë Parlamentit, hidh fishekzjarrë, digj letra, aksione pa kurrë farë logjike. Duhet të hyjmë të Parlament. Në 10 vitet e fundit opozita shqiptare ka dalë gati 3 vjet jashtë Kuvendit. 

Pika e dytë është që duhet të merremi me ligjin elektoral. Në fakt gjysma e opozitës nuk ka qejf ta ndryshojë këtë ligj, gjysma e Berishës, Rithemelimi. Pse nuk merren me këtë punë, sepse iu intereson se strehohen te lista shumë-emërorë.

Pika e tretë i janë turrur SPAK-ut. Një parti serioze, një opozitë serioze nuk mban këtë pozicion ndaj SPAK-ut përtej kritikave që i kam edhe unë. Drejtësinë duhet ta lëmë të jetë e pavarur. SPAK-un nuk e udhëheq Edi Rama, por e udhëheqin të huajt.

Pika e katërt, është a ndërtohet një marrëdhënie me komunitetin ndërkombëtar, me Partitë Popullore Evropiane, me SHBA-në. Kjo lloj gjuhe ndaj të huajve më duket e papricip fare dhe po i bën dëm të gjithë kampit opozitar. Duhet të rindërtojmë marrëdhëniet me miqtë tanë tradicionalë”, u shpreh Shehi.

/rtsh.al/