Shërbimi shëndetësor stomatologjik publik në Pogradec tashmë ofrohet në ambientet e reja pranë njësisë vendore të kujdesit shëndetësor duke lënë pas ambientet e vjetra të ndodhura në maternitetin e qytetit.

Kjo zhvendosje ka sjellë gjithashtu edhe mjete pune të reja dhe moderne, të cilat sipas drejtores Elona Katiraj do rrisin cilësinë e shërbimit.

“Kemi bërë një ndryshim, kemi pajisur me mjete bashkëkohore, stafi është më komod tani. Po ashtu dhe nxënësit e shkollën apo dhe njerëzit që marrin shërbimin aty”, tha Katiraj.

Katiraj bën të ditur gjithashtu edhe kategoritë që e përfitojnë shërbimin stomatologjik falas.

“Shërbimi në këtë stomatologji është falas  dhe njëkohësisht është për kategorinë nga 0 deri në 18 vjeç, për pensionistët dhe për kategorinë e invalidëve”, tha ajo.

Kujdesi për dhëmbët është shumë i rëndësishëm për të gjithë, ndaj edhe për këtë stomatologët bëjnë thirrje për kontrolle të vazhdueshme dhe higjienën e dhëmbëve që në periudhën foshnjore.

/rtsh.al/