Ambasadori i komanduar i delegacionit të Bashkimit Evropian në Shqipëri, Luigji Soreka, ka përfunduar të mërkurën detyrën e tij në vendin tonë. Kjo është bërë e ditur nga vetë Soreka, nëpërmjet një postimi në rrjetet sociale. Sipas tij, në këta 3 muaj ka përmbushur misionin për të mbështetur Shqipërinë në rrugën drejt integrimit në Bashkimin Evropian.

“Ishte një nder dhe kënaqësi të drejtoja sërish ekipin e madh të Delegacionit të BE-së në Shqipëri. Në tre muajt e fundit, ne kemi përmbushur shkëlqyeshëm misionin tonë për të mbështetur Shqipërinë në rrugën e saj drejt BE-së. Faleminderit shumë për përkushtimin dhe qëndrueshmërinë tuaj!”, shkruan Soreca.

Ai ka inkurajuar vendin tonë që të vijojë punën “e shkëlqyeshme”, derisa Shqipëria të bashkohet me BE-në”, shkruan Soreka. 

Ambasadori Soreka u rikthye në 1 shtator 2023 në krye të delegacionit të BE-së në Shqipëri, pas largimit të gjermanes, Christine Hohmann.

/rtsh.al/