Profesionet e zanatit janë shumë të kërkuara sot në Shqipëri.

Gjolekë Gjolleshi 65-vjeçari saldator nga Gjirokastra punon ende. Që prej mbarimit të shkollës profesionale në Elbasan 50 vite më parë ai i shërben komunitetit në Gjirokastër dhe kryesisht drejtuesve të automjeteve. Specialiteti i tij është saldator për makinat.

Gjoleka pret pensionin por ai e di shumë mirë se vitet e punës nuk do t’i vlerësohen me statusin që meriton.

“Ky është një zanat i vështirë, në atë kohë dalja në pencion ishte 55 vjeç, tani 65. Edhe në dokumenta që paguajmë nuk na shkruhet saldator por punëtor. Kemi pyetur dhe na kanë thënë që punëtor shkruhet. Këta kanë mohuar të tëra gjërat“, shprehet ai.

Profesionet e përpunuesit dhe kryesisht saldimit janë tepër të vështira pasi pasojat tek shikimi dhe pluhurat karbonikë ndikojnë në shëndetin e punonjësve.

Gjolekën e gjen përditë në vendin e punës, në ofiçinën e tij, edhe pse të ardhurat që ai grumbullon janë të pamjaftueshme për të siguruar jetesën minimale.

Gazetar: Norel Zaimi

/rtsh/