Sulmet ruse ndaj ambasadave të BE-së në Kiev, Franca kërkon mbledhje urgjente të Këshillit të Sigurimit të OKB-së

Franca ka kërkuar thirrjen e një mbledhjeje të Këshillit të Sigurimit të Kombeve të Bashkuara pas një vale të re sulmesh masive ruse mbi Ukrainën të premten, të cilat shkaktuan dëme në ambasadat e Austrisë dhe Holandës në Kiev. Lajmi u bë i ditur nga ministri i Jashtëm francez, Jean-Noël Barrot, i cili i cilësoi sulmet si krime dhe shkelje të rënda të ligjit ndërkombëtar, duke theksuar se Rusia do të duhet të japë llogari për veprimet e saj.
Kjo ofensivë e re me raketa dhe dronë erdhi menjëherë pasi presidenti rus Vladimir Putin u zotua për një kundërpërgjigje “të dhimbshme”, pas sulmeve të Ukrainës këtë javë që dëmtuan rëndë urën e Krimesë. Sipas autoriteteve ukrainase, sulmet e natës lanë të vrarë të paktën tetë persona në të gjithë vendin, shtatë prej të cilëve vetëm në kryeqytetin Kiev, si dhe dëmtuan rëndë dy ura kryesore të qytetit. Presidenti ukrainas Volodymyr Zelensky deklaroi se Rusia lëshoi mbi 110 raketa gjatë natës, duke e cilësuar këtë si “një nga sulmet më të mëdha” të luftës gati pesëvjeçare dhe një akt të pastër “terrori”.
Ndërkohë, tensionet janë përhapur edhe përtej kufijve të Ukrainës, pasi ministri polak i Mbrojtjes deklaroi se një raketë lundruese ruse e tipit KH-101 ka rënë me gjasë në territorin polak, pa shkaktuar viktima. Varshava dënoi “provokimin” rus pas tre shkeljeve të hapësirës së saj ajrore.
Në reagim të menjëhershëm, Sekretari i Përgjithshëm i NATO-s, Mark Rutte, dënoi “shkeljet e rënda” të hapësirës ajrore polake dhe konfirmoi ngritjen në ajër të avionëve luftarakë të aleancës. Edhe Ministria e Jashtme gjermane u shpreh ashpër, duke theksuar se ky incident tregon se Putin vazhdon të kërkojë konfrontim në vend të negociatave, ndërsa ambasada ruse në Holandë i bëri thirrje Hagës që të marrë seriozisht rekomandimin e saj për largimin e diplomatëve të huaj nga Kievi, pasi qeveria holandeze thirri ambasadorin rus për dëmtimin e ambasadës së saj.
Në sfondin e përshkallëzimit ushtarak, lëvizjet diplomatike po intensifikohen. Sipas raportimeve të Financial Times, administrata e presidentit amerikan Donald Trump u ka komunikuar zyrtarëve evropianë dhe ukrainas se dëshiron që Kievi të arrijë një marrëveshje paqeje me Rusinë deri në fillim të janarit, përpara se demokratët të marrin kontrollin e Kongresit.
Nga ana tjetër, presidenca franceze komentoi diskutimet mbi garancitë e sigurisë për Ukrainën të ngjashme me Nenin 5 të NATO-s, ku një këshilltar i presidentit Emmanuel Macron u shpreh për gazetarët se dhënia e garancive të tilla do të ishte e barasvlershme me anëtarësimin faktik të Ukrainës në aleancën ushtarake.
Përveç fronteve të luftës dhe diplomacisë, agjencia e OKB-së për Fëmijët (UNICEF) ngriti alarmin për pasojat mbi civilët, duke raportuar se numri i fëmijëve të vrarë dhe të plagosur në Ukrainë gjatë dhjetë muajve të parë të vitit 2026 ka arritur në të paktën 1,144, shifër kjo që u afrohet niveleve tragjike të vitit të parë të pushtimit në 2022, ndërsa janë verifikuar edhe rreth 270 sulme ndaj objekteve arsimore. Paralelisht, tensionet e lidhura me inteligjencën ruse janë shfaqur edhe në veri të Evropës, ku televizioni publik danez DR bëri të ditur se dy shtetas danezë janë arrestuar nën dyshimin se janë rekrutuar nga shërbimet ruse për të vrarë reperin ukrainas Kyivstoner, i cili pritej të mbante një koncert në Danimarkë.
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Komentet 0
Ende nuk ka komente. Bëhuni i pari që komenton.




