Sfida energjitike ka qenë në qendër të një takimi mes kryeministrit Edi Rama dhe atij të Kosovës, Albin Kurti, që u zhvillua sot në Tiranë. Qeveria e Kosovës, nëpërmjet zëdhënësit të saj, ka dhënë më shumë detaje mbi takimin e mbajtur mes dy kryeministrave.

Zëdhënësi i kryeministrit Kurti, Përparim Kryeziu, bëri të ditur se biseda mes dy kryeministrave u fokusua në sfidat energjetike dhe shkëmbimet që po bëjnë KEK me KESH.

“Kryeministri Kurti ka zhvilluar sot një takim pune me kryeministrin e Shqipërisë, Edi Rama. Në këtë takim, dy kryeministrat kanë folur për çështjet e politikave publike e qeveritare dhe socio-ekonomike në Kosovë e Shqipëri, me theks të veçantë në sfidat energjetike, si dhe shkëmbimin që po bëjnë KEK me KESh”, ka thënë ai.

Kurti dhe Rama u takuan sot në “Vilën 31”, në një takim që zgjati për rreth 2 orë dhe që u zhvillua me dyer të mbyllura.

/rtsh.al/