Industria e muzikës alt-pop është tronditur nga një prej ngjarjeve më të rënda të viteve të fundit. Këngëtari 21-vjeçar David Burke, i njohur me emrin artistik D4vd, është akuzuar zyrtarisht për vrasjen e shkallës së parë të 14-vjeçares Celeste Rivas Hernandez, trupi i dekompozuar i së cilës u gjet në shtatorin e kaluar brenda automjetit të tij të braktisur.

Zyra e Prokurorit të Qarkut të Los Anxhelosit njoftoi të hënën se ndaj Burke rëndojnë akuza të rënda, përfshirë vrasjen me paramendim, akte të turpshme me një të mitur dhe gjymtim të trupit.

Detajet rrëqethëse të hetimit

Viktima, Celeste Rivas Hernandez, ishte raportuar e zhdukur nga familja e saj që në vitin 2024. Sipas Prokurorit të Qarkut, Nathan Hochman, hera e fundit që ajo u dëgjua ishte data 23 prill 2025, kur kishte shkuar në shtëpinë e këngëtarit në Hollywood Hills.

Zbulimi i tmerrshëm ndodhi më 8 shtator, vetëm një ditë pasi Celeste do të mbushte 15 vjeç. Një automjet “Tesla Model Y”, i regjistruar në emër të Burke, u tërhoq si i braktisur nga një lagje luksoze. Gjatë kontrollit në oborrin e rimorkimit, hetuesit gjetën qese mbeturinash që përmbanin mbetje njerëzore.

“Hetuesit gjetën një qese kufome të mbuluar me insekte dhe me një erë të fortë kalbjeje. Brenda saj u gjetën koka dhe busti i viktimës, ndërsa krahët dhe këmbët ishin prerë dhe vendosur në një çantë të dytë,” thuhet në dokumentet e gjykatës.

Rrethanat e veçanta dhe rreziku i dënimit me vdekje

Prokurorët kanë përfshirë në padi “rrethana të veçanta” që e bëjnë këtë rast të kualifikueshëm për dënimin me vdekje ose burgim të përjetshëm pa të drejtë lirimi. Ndër to përmenden vrasja në pritë; përfitimi financiar; vrasja e dëshmitarit për të penguar hetimin.

Deri më tani, raporti i autopsisë mbetet i bllokuar me urdhër gjykate, por pritet të publikohet së shpejti pas arrestimit të Burke, i cili u prangos të enjten e kaluar në Hollywood.

Mbrojtja: David Burke nuk është vrasësi

Pavarësisht provave të rënda materiale, avokatët e këngëtarit të lindur në Hjuston kanë deklaruar pafajësinë e tij absolute.

“Provat aktuale në këtë rast do të tregojnë se David Burke nuk e vrau Celeste Rivas Hernandez dhe ai nuk ishte shkaku i vdekjes së saj,” deklaroi ekipi ligjor i artistit, duke u zotuar për një mbrojtje agresive.

Rënia e një ylli në ngjitje

D4vd u bë një fenomen global në vitin 2022 me hitin viral në TikTok, “Romantic Homicide”, një këngë që ironikisht flet për fundin tragjik të një marrëdhënieje. Popullariteti i tij i madh mes Gjeneratës Z e dërgoi atë në majat e toplistave të Billboard dhe i siguroi kontrata me shtëpi diskografike prestigjioze si Interscope Records.

Pas përhapjes së lajmit për përfshirjen e tij në vrasje, këngëtari u detyrua të anulonte pjesën e mbetur të turneut të tij në Amerikën e Veriut dhe të gjithë turneun evropian. Ndërsa procesi gjyqësor sapo ka filluar, ky rast mbetet, sipas prokurorit Hochman, “makthi më i madh i çdo prindi”.

/rtsh.al/