Tregtia e jashtme e mallrave në Shqipëri ka regjistruar një zgjerim të mëtejshëm të deficitit tregtar gjatë muajit gusht 2026, i nxitur kryesisht nga rritja me dy shifra e importeve. Sipas të dhënave zyrtare të publikuara nga Instituti i Statistikave (INSTAT), eksportet shënuan një rritje modeste vjetore, ndërsa importet e mallrave vijuan me ritme të larta rritjeje.

Sipas raportit të INSTAT, “në Gusht 2026 eksportet e mallrave arritën vlerën 20,5 mld lekë, duke u rritur me 1,6 %, në krahasim me të njëjtën periudhë të një viti më parë”. Megjithatë, krahasuar me muajin korrik 2026, eksportet pësuan një rënie sezonale prej 39.0%. Nga ana tjetër, “importet e mallrave arritën vlerën 75,6 mld lekë, duke u rritur me 12,6 %, në krahasim me një vit më parë”.

Deficiti tregtar dhe kontributi i grupmallrave

Si rrjedhojë e ecurisë së diferencuar mes hyrjeve dhe daljeve të mallrave, bilanci tregtar shënoi përkeqësim. “Defiçiti tregtar i këtij muaji është 55,0 mld lekë, duke u rritur me 17,4 %, krahasuar me një vit më parë dhe me 4,3 %, në krahasim me Korrik 2026”, bën të ditur INSTAT.

Në ecurinë e eksporteve, ndikimin më pozitiv e dhanë grupet “Materiale ndërtimi dhe metale” dhe “Ushqime, pije, duhan” me nga +1.3 pikë përqindje secili, si dhe “Minerale, lëndë djegëse, energji elektrike” me +0.7 pikë përqindje. Përkundazi, goditjen më të madhe e mori grupi “Tekstile dhe këpucë”, i cili ndikoi negativisht me -2.9 pikë përqindje.

Tek importet, rritja prej 12.6% u udhëhoq nga grupi “Makineri, pajisje dhe pjesë këmbimi” me +4.8 pikë përqindje dhe “Minerale, lëndë djegëse, energji elektrike” me +3.5 pikë përqindje.

Sa i përket partnerëve tregtarë, Shqipëria shënoi rritjen më të madhe të eksporteve drejt Italisë (+5.0%) dhe Kosovës (+1.5%), ndërsa rënia më e theksuar u regjistrua me Turqinë (-54.1%) dhe Maqedoninë e Veriut (-5.6%). Në krahun e importeve, rritje më e lartë u shënua nga Kina (+16.9%) dhe Italia (+2.2%).

“Shkëmbimet tregtare me vendet e BE-së zënë 46,2 %, të gjithë tregtisë. Në Gusht 2026, eksportet drejt vendeve të BE-së zënë 63,1 % të eksporteve gjithsej dhe importet nga vendet e BE-së zënë 41,6 %, të importeve gjithsej.”

INSTAT sqaron se të dhënat e tregtisë së jashtme bazohen në burime administrative nga Drejtoria e Përgjithshme e Doganave dhe i nënshtrohen rishikimeve metodologjike periodike sipas standardeve ndërkombëtare.

/rtsh.al/