Muzeu Kombëtar i Arsimit në Korçë me rastin e 136 vjetorit të hapjes së Mësonjëtorës së Parë Shqipe, ka çelur një ekspozitë me sende personale, objekte, korrespondenca dhe materiale të ndryshme të personaliteteve që kanë kontribuar në çeljen e kësaj shkolle si dhe në mësimdhënien tek Mësonjëtorja e Parë Shqipe.

Ka qënë studiuesi, Niko Kotherja ai që ka grumbulluar nga pasardhësit e këtyre personaliteteve të arsimit dëshmitë e asaj ngjarjeje të madhe të arsimit shqiptar. Përgjegjësja e muzeut Shirli Treska bën me dije se të gjitha objektet e paraqitura në këtë ekspozitë dalin për herë të parë për publikun

Përshtypjet për këtë ekspozitë, i kanë ndarë disa ish-mësues nga Korça, si edhe disa ish-mësues nga Maqedonia e Veriut, që në këtë ditë të veçantë, janë ndalur në Korçë.

136 vite më parë patriotë shqiptarë pas përpjekjeve të shumta ia kanë dalë për të çelur në vendin tonë shkollën e parë laike të gjuhës shqipe. Drejtor i kësaj shkolle ishte Pandeli Sotiri.

/rtsh/