Çdo 16 prill shumë qytetarë të Kosovës rikthehen në Kukës për të përkujtuar eksodin biblik të 1999, ku gjetën mikpritjen bujarinë dhe zemrën e hapur për ta.

Sheshi edhe këtë vit është mbushur plot me qytetarë të Kosovës. Pritja bëhet nga bashkia e Kukësit.

Ndërsa në këtë ditë, qytetarët e Kosovës shoqërohen nga ambasadori, Qemal Minxhozi.

Me 27 mars 99, nisi spastrimi etnik nga forcat ushtarake dhe paramilitare serbe e të parët që kaluan kufirin ishin banorët e Krushës së Madhe duke lënë pas më shumë se 240 të vrarë e masakruar në fshat e qindra të tjerë të plagosur e përdhunuar me të paktën 800 shtëpi të djegura e të shkatërruara.

Eksodi vijoi gjatë gjithë muajit prill. Në Kukës mbërritën rreth 700 mijë qytetarë të Kosovës, një pjesë e tyre me pas u zhvendos në qytetet e tjera të Shqipërisë deri në 13 qershor ’99 kur Kosova u çlirua nga trupat tokësore të NATOS dhe UÇK-së.

Gazetare: Klea Neli

/rtsh/